• ×

الجمعة 11 ربيع الأول 1444 / 7 أكتوبر 2022

بدل التميز .. قصتي معاه عجب ..

زيادة حجم الخط مسح إنقاص حجم الخط
أ . حميد بن أحمد المالكي
لي صديق يعمل في القطاع الصحي ، اتصل بي ذات يوم ، وبعد السلام والسؤال عن الاحوال ..

قال : العلم لك خير ..
قلت : الخير بوجهك ..
قال : زواجي من الثالثه قرررررب ومحتاج ( شوية ) فلوس وتكفى يالنشمي سلفني وابشر بسعدك اول ما يجيني ( بدل التميز ) ابشر ارد دينك ..

المهم انا استحيت ارده ، قلت له : ابشر ، وانا ما ادري ( وش هوه بدل التميز ذا !! ) ..

سلفت الرجال وابشركم تزوج الثالثه ، وانا تبون الصراحه يمكن من الاسباب اللي خلتني اوافق على اني ( اسلفه ) ، اعجابي في ( شجاعته ) على الزواج من ( الثالثه ) وانا ( واحده ) ويالله الخرااااااج ..

المهم ما لكم في طوالها ..

مرت الثواني والدقايق والساعات والايام والاسابيع والشهور ، وانا كل ما اكلم خوينا يقل لي : ما بعد جاني والله ( بدل التميز ) وانا بيني وبينكم ما اقدر اقله شي لانه من يوم طلب السلفه قال : ارد دينك من( بدل التميز ) ..

لا اخفيكم إني صرت اتابع واتابع في ( بدل التميز ) كاني معني به ومن اللي بينصرف لهم ، كني موظف زميل لهم ، ( اتحرى ) في بدل هالتميز ..

وآخر مره اتصلت به وكنت يالتييييف مرررره مرررره زعلان ، قلت : ياخي وشلي ببدلكم ذا ، دبر فلوسي تراني حتى انا ابتزوج الثانيه ، ( اكذب ) عليه بيني وبينكم ( يارب سامحني ) قلت يمكن عشان ( احنن ) قلبه واخليه يستعجل في سداد ديني ..

ورجع حضرة جنابه ، ( للاسطوانه المشروخه ) وقال : ياخي المؤمنين على شروطهم ، انا قلت لك من الاول لما يجي ( بدل التميز ) ..

قلت : ياليل الليل ، ياخي بس طولت المساله يا ابن الحلال وبعدين معاك وبدل تميزك ذا اللي فلقتنا به ..

قال : ابشرك معالي الوزير امر يالصرف بعد عيد الحج هذه السنه مباشره ..

تبون الصدق ، انا بغيت اطير من الفرح ، وقعدت انطنط مثل الاطفال واردد زي المجنون ( بترجع فلوسي بترجع فلوسي .. ) ..

جاء الحج وجاء العيد وعيدنا وانا اعد الساعات ، وكل يوم اصبّح وامسّي على حبيبنا ، اسوي نفسي يعني ( احبه ) وانا بس ( اجر ناعم معاه ) الين اخذ ( فلوسي ) وبعدها ( اوريكم فيه ) ..

مر اسبوع اسبوعين انتهى شهر الحج كله ، وانا اقول :* يا ابويه وين الفلوس ..

وهوه يقول : رفعنا كلنا بس والله للان ما جاء شيء !!

قلت : طيب متى ؟؟

قال : علمي علمك يا ابن الحلال !!

واهوه دخلنا السنه الجديده ( ٤٤ ) وقربنااااة نخلص شهر محرم كله وانا زي اللي ( ضيعت ) ( شالها ) وخرجت بشعرها ( منكوش ) ولا عندها ( فلوس ) تشتري ( شال ) ..

قلت له : طيب بالله انا وش ذنبي ياخي ( بدل التميز ) حقك تاخر ، وش ذنبي انا ؟؟!!

قال : اللي اوله شرط آخره سلامه يا حبيبي ، يجيني ( بدل التميز ) اسدد دينك ، غير كذا اصبر زي ما انا صابر ..

الصدق الصدق ، الرجال صادق وانا اللي جبته لنفسي ، وهوه قال من الاول ولا لف ولا دار ، وما عاد باقي لنا الا ننتظر ( بدل تميزه ) عشان يسد ديننا ، ويارب يارب يكون قريب ..

وان شاء الله معالي وزير الصحه يستعجلهم في الصرف عشان حبيبنا ذا يستلم ويسلمني ..

اصل الفلوس اللي اعطيتها لحضرته ماهي قليله ( مكدة ) سنه ، (* ٦ الاف و ٣٠٠ و ١١ ريال ) ريال ( ينطح ) ريال ..

يالله شكلي دوشتكم بقصتي مع صاحبنا ذا ، بس ايش اسوي حبيت اقلكم عشان تدعون معايه ان ( بدل التميز ) ينصرف بسرعه لحبيبنا ذا واخذ ديني منه و اغير ( كفر ) سيارتي اللي صار ( محبْل ) من ( حُفر ) الشوارع اللي اللواحده قد ( راس الفيل ) يالطيف ..

هيه مع السلام ولا تنسون تدعون لصاحبنا وليه امانه امانه ، وانتبهوا تسلفون واحد ويقلكم اسدكم من ( بدل التميز ) وتحطون بعدين ( ايدكم ) على ( خدكم ) ..


بقلم : حميد بن احمد المالكي
hdath@hotmail.com
0505656269
أ . حميد بن أحمد المالكي

 0  0  29859

التعليقات ( 0 )

جميع الأوقات بتوقيت جرينتش +3 ساعات. الوقت الآن هو 01:32 مساءً الجمعة 11 ربيع الأول 1444 / 7 أكتوبر 2022.